ரோல்ஸ் ராய்ஸ்களின் சாலை

ரோல்ஸ் ராய்ஸ்களின் சாலை

அன்றாடத்தின் பாடுகள் என்பது மனிதகுலம் தோன்றியதிலிருந்தே நீக்கமற நிறைந்திருக்கிறது. இன்னுமெத்தனை நூற்றாண்டுகள் கடந்து போனாலும் அவைகளுக்கு முற்றுப்புள்ளி கிடையாது. பொருளாதார நிமித்தம் அல்லது வாழ்வின் நிர்பந்தம் பொருட்டு பால்யத்தை சொந்த ஊரில் வைத்துவிட்டு அதன் நினைவுகளை ஏந்தி நகரமேகுகிற யாவருக்குள்ளும் சில விடுபடல்கள் இருந்தேயிருக்கின்றன. வாழ்ந்து தீர்க்க வேண்டிய பொதிகளைச் சுமந்தபடிதான் எல்லோரது வாழ்வும் ஆசிர்வதிக்கப்பட்டிருக்கிறது.
கலை ஒன்று மட்டுமே தோளிலிருந்து கனக்கும் அந்தப் பொதிகளை சிறிய அளவிலேனும் அகற்றவல்லது. காலந்தோறும் அகப்புறக் காரணிகளால் சிக்குண்ட மனதினை ஆற்றுப்படுத்துகிற பெரு வல்லமையும் அதற்குண்டு. சிக்கல்கள் இல்லாத எளிமையின் சொல் மொழியால் வாழ்வின் பாடுகளையும்,எளிய கனவுகளையும், தனக்குரிய அரசியலையும் சாரமாகக் கொண்டு முன்வைக்கிற தொனி தணிகாவின் கவிதைகளெங்கும் விரவியிருக்கிறது. கடந்துவந்த முள்தடங்களை நினைவுகூர்ந்து, இக் கவிதைகளின் வழியாக அவைகளைச் சித்திரப்படுத்துவதோடு அல்லாமல் காலவோட்டத்தில் தாமடைந்திருக்கிற முதிர்ச்சியினையும் இத்தொகுப்பு முழுதும் படரவிட்டிருக்கிறார் தோழர் தணிகா...
-சம்பு