ஒரு கற்றை மயிர்

ஒரு கற்றை மயிர்

வாசகரென்று சீட்டு எடுத்துக்கொண்டு, புனைகதை வண்டிகளில் முப்பது ஆண்டுகளாகப் பயணித்த என்னை, இன்று காலமும் ஹெர் ஸ்டோரிஸும் இறக்கிவிட்ட இடம் - படைப்புக் களம்.
இது என்னுடைய முதல் புனைவு. சிறுகதைகளின் தொகுப்பு நூல். நான் இதுவரை ஒரு வேடிக்கைப் பார்ப்பவர், ஒரு மென்பொறியாளர், ஒரு வாசகர், ஒரு காதலி மற்றும் ஒரு பெற்றோர். இன்றிலிருந்து ஓர் எழுத்தாளரும்கூட.
தலைப்பு தரும் அதிர்வு கதைகளுக்குள்ளும் உண்டு. நகர, மத்தியதர குடும்ப அமைப்பைப் பற்றிய - முற்றிலும் புதிய தளங்களில் பயணிக்கும் கதைகள் இவை. தனக்கென ஓர் எளிய பாணி, அதிலேயே வளமையான கதை சொல்லல். ஆபேரியின் இந்தப் புத்தகத்தில் பெண் மொழி எப்படி உள்ளது? எளிய ஓர் ஓடைபோலத் தொடங்கி, மெல்ல அடர்ந்து, இன்னும் அடர்ந்து செறிவாக விரிந்து, நதியாகப் பிரவாகம் எடுத்து, காடு கரை அனைத்தையும் அள்ளிக் கொண்டு பெருக்கெடுத்து ஓடுகிறது; ஜீவனுள்ள பெண் மொழி ஆபேரியை அறிமுகப்படுத்துவதில் ஹெர் ஸ்டோரிஸ் நிச்சயம் பெருமை கொள்ளலாம்.
பிருந்தா சேது
கவிஞர். எழுத்தாளர், திரைக்கதை ஆசிரியர்