தடுத்திடு! தாக்கிடு!

தடுத்திடு! தாக்கிடு!

தாக்குவதற்கு மட்டுமே அல்ல தற்காப்புக் கலைகள்; தற்காத்துக் கொள்வதற்கும் அவை இன்றியமையாதன. இக்கட்டான எத்தனையோ சூழல்களில் நமது உடமைகளையும், கண்ணியத்தையும், உயிரையும்கூடக் காத்துக்கொள்ளுவதற்குத் தற்காப்புக் கலை ஏதாவது ஒன்றில் பயிற்சியும் தேர்ச்சியும் பெற்றிருப்பது காலத்தின் கட்டாயம்.
தீமைகளைத் தட்டிக்கேட்பதற்கும், தனிமையில் வாழும்போதும், ஆளரவம் அற்ற பகுதிகளில் நடமாடும்போதும் தற்காப்புக் கலை ஏதாவது ஒன்றில் நாம் தேர்ந்திருந்தால் மனதில் தன்னம்பிக்கையும் துணிச்சலும் உடலில் சவால்களை எதிர்கொள்ளும் ஆற்றலும் பெருகுவதை உணரலாம்.
அந்தப் பண்புகளை இந்த நூல் உங்களிடம் வளர்த்தெடுக்கும். இந்தியாவின் பல மாநிலங்களுக்கும் உரித்தானவை. அண்டை நாடுகளில் தோன்றி வளர்ந்தவை எனப் பல விதமான தற்காப்புக் கலைகளின் வரலாறு, தனித்துவமான அம்சங்கள், தாக்குதல் நேர்ந்தால் தடுக்கும் விதங்கள், எதிராளியை நிலைகுலையச் செய்யும் உத்திகள், தற்காப்புக் கலைகள் தொடர்பான போட்டிகள், கலந்துகொண்டவர்களின் சாதனைகள் போன்ற பல தகவல்களையும் சுவாரசியமாக இந்த நூல் சொல்லிச் செல்லும்.
இளைஞர்கள் - குறிப்பாகக் கல்வி கற்போர் அதிலும் முக்கியமாக மாணவிகள் கட்டாயம் தற்காப்புக் கலைகளைப் பற்றி அறிந்திருப்பதும் ஏதாவது ஒன்றில் தேர்ச்சி பெற்றிருப்பதும் மிக மிக அவசியம்.
உள்ளத்துக்கும் உடலுக்கும் வலு சேர்க்கும் தற்காப்புக் கலைகளின் தொகுப்புத்தான் ‘தடுத்திடு! தாக்கிடு!'