செம்மொழித் தமிழ்

செம்மொழித் தமிழ்

1946 ஆம் ஆண்டு ஆகஸ்டுத் திங்கள் 6ஆம் நாள் தெய்வத் திருவாளர்கள் சந்திரசேகரன் சாரதாம்பாள் இணையரின் மகனாக அரியலூர் மாவட்டம் உடையார் பாளையத்தில் பிறந்த நான் சிதம்பரம், குமராட்சி வட்டம் கொத்தவாசல் நடுநிலைப் பள்ளியில் தொடக்கக் கல்வி, நடுநிலைக் கல்வி ஆகியவற்றையும் உடையார் பாளையம் உயர் நிலைப் பள்ளியிலும் சிதம்பரம் பச்சையப்பன் உயர்நிலைப் பள்ளியிலும் உயர்நிலைக் கல்வி கற்றேன். தமிழ், வரலாறு, சமூகவியல், சமூக நல நிர்வாகம், கல்வியியல் ஆகிய ஐந்து பாடங்களில் முதுகலைப் பட்டங்கள் பெற்றிருக்கிறேன். பாரதிதாசன் படைத்த பாண்டியன் பரிசு என்னும் நூலை ஆய்வு செய்து ஆய்வியல் நிறைஞர் (எம்.பில்) பட்டம் பெற்றேன்.
1967ஆம் ஆண்டு ஆசிரியர் பணியில் சேர்ந்த நான் ஆந்திரமாநிலம், ரெய்ச்சூர், கேரள மாநிலம் பாலக்காடு, தமிழ்நாட்டின் ஜோலார்பேட்டை ஆகிய தென்னக இரயில்வே பள்ளிகளிலும், நிறைவாகத் திருச்சி பொன்மலை இரயில்வே பள்ளியில் 20ஆண்டுகள் பட்டதாரி தலைமையாசிரியராகப் பணிபுரிந்து 2006ல் ஓய்வு பெற்றேன். ஏறத்தாழ 39ஆண்டுகள் ஆசிரியர் பணியில் 32 ஆண்டுகள் தென்னக இரயில்வே பள்ளிகளில் மட்டுமே பணியாற்றியுள்ளேன்.
திருவரங்கம் பகுதியில் திராவிட முன்னேற்றக் கழகத்தை வளர்த்தவரும், பேரறிஞர் அண்ணா, டாக்டர் கலைஞர் ஆகியோரின் அன்பைப் பெற்றவருமான திருமிகு நடராஜன் திருமதி குசலாம்பாள் இணையரின் திருமகளார் அருண்மொழி அவர்களை 1973ஆம் ஆண்டு திருவரங்கத்தில் கலைஞர் கருணாநிதியின் தலைமையில் வாழ்க்கைத் துணையாக ஏற்றேன். எங்களுக்கு மூன்று ஆண்மக்கள். மூத்தமகன் கமல நாராயணன் (அமெரிக்கர்) தற்சமயம் சென்னையிலும். அடுத்த மகன் சந்திரசேகர் கனடாவிலும், இளைய மகன் கார்த்திகைச் செல்வன் சென்னையிலும் பணியாற்றி வருகிறார்கள்.
திருவரங்கம் இராசவேலர் செண்பகத் தமிழ் அரங்கின் 'நற்றமிழ்ச் சான்றோர் விருது' திருச்சிராப்பள்ளித் திருக்குறள் பேரவை 'ஆசிரியர் நன்மணி' விருது, திருச்சிராப்பள்ளித் தமிழ்ச் சங்கம் நிறுவநர் நாளில் 5000 உரூபாய் ரொக்கப் பரிசுடன் வழங்கிய 'செந்தமிழ்த் தொண்டர்' விருது, 2006ஆம் ஆண்டு சென்னை அரிமா சங்கம் வழங்கிய 'சிறந்த தலைமை ஆசிரியருக்கான' விருது, திருச்சி அறிவாளர் பேரவை வழங்கிய தமிழ் மொழிச் செம்மல்' விருது, உலகப் பாவலர் தமிழன்னைத் தமிழ்ப் பேரவை வழங்கிய 'அறிஞர் அண்ணா' விருது. முத்தமிழ்க் காவலர் கி.ஆ.பெ.விசுவநாதம் விருது. பன்னாட்டுத் தமிழுறவு மன்றத்தின் 'தமிழ்ப் பணி செம்மல்' விருது உள்ளிட்ட பல்வேறு விருதுகளைப் பெற்றுள்ளேன். மேலும் தென்னக இரயில்வே, மண்டல அளவிலும் கோட்ட அளவிலும் சிறந்த தலைமை ஆசிரியராகப் பலமுறை தேர்வு செய்து ரொக்கப் பரிசுகளும் விருதுகளும் வழங்கிச் சிறப்பித்துள்ளது.
புரட்சிப் பாவேந்தர் பேரவையின் ஒருங்கிணைப்பாளர், திருச்சிராப்பள்ளித் தமிழ்ச் சங்கத்தின் செயற்குழு உறுப்பினர். பன்னாட்டுத் தமிழுறவு மன்றத்தின் திருச்சிராப்பள்ளி துணைத்தலைவர், திருச்சி அறிவாளர் பேரவையின் மேனாள் பொதுச் செயலாளர், திருச்சித் திருக்குறள் பேரவையின் இணைச் செயலாளர், திருச்சி கோவிந்தம்மாள் தமிழ் மன்றத்தின் துணைத்தலைவர். உலகப்பாவலர் தமிழன்னை தமிழ்ப் பேரவை என்ற பன்னாட்டமைப்பின் துணைத்தலைவர். சிரா இலக்கியக் கழகத்தின் ஆலோசகர் எனப் பல்வேறு தமிழ் அமைப்புகளில் முக்கிய பொறுப்புகளையேற்றுத் தமிழ்ப் பணியாற்றி வருகிறேன்.
திருவரங்கம் இராசவேலர் செண்பகத் தமிழரங்கம், பாவாணர் தமிழ் இயக்கம், தமிழ் இலக்கிய ஆய்வுப் பண்ணை. அறிவியக்கப் பேரவை. பைந்தமிழ் இயக்கம், முசிறி தமிழ்ச் சங்கம், குளித்தலை தமிழ்ப் பேரவை முதலிய பல்வேறு தமிழ் அமைப்புகளோடு நல்ல தொடர்பு கொண்டு, தண்டமிழுக்கு நற்றொண்டு ஆற்றி வருகிறேன். தற்சமயம் திருச்சி நொச்சியத்தில் சொந்த இருப்பிடத்தில் வசித்து வருகிறேன்.