மீதம் இருக்கும் மனிதம்

மீதம் இருக்கும் மனிதம்

இருபத்தொன்றாம் நூற்றாண்டில் பெண்கள் இரண்டாம்தர பிரஜைகளாக நீடிக்க வேண்டும் என்கிறது நமது ஆணாதிக்கச் சமூகம். பெண்களின் நுண்ணறிவும் பொதுவெளியில் அவர்கள் ஈட்டியுள்ள மரியாதையும் அசாத்திய செயல்திறனும் சாம்பாத்தியமும் ஆண்களிடையே ஏற்படுத்திவிட்ட அச்சம் அத்தகையது. தேவைகளையும் சுகங்களையும் சேவைகளையும் இலவசமாக வழங்கும் பெண்ணைத் தனக்குக் கீழ் அடக்கி வைத்துக்கொள்ள அறமற்ற வழிகளைப் பின்பற்றுகிறார்கள். இது ஆணினத்தின் பண்பாட்டுக் குறை வளர்ச்சியையும் அறிவின் போதாமையையும் பறைசாற்றுகிறது.
குடும்ப அமைப்பினுள் சுமைகள், ஒடுக்குமுறை, பாலியல் - பொருளாதாரம் இவற்றுடன் உணர்வுச் சுரண்டல், வன்முறை, துரோகம், ஏமாற்று என பெண் தவறாகப் பயன்படுத்தப்படுவது இயல்பானதென்றே நம்பவைக்கப்பட்டது. இவற்றை எதிர்க்கும் பெண்களின் "கற்பு" சந்தேகிக்கப்பட்டது. ஒடுக்குமுறை மேலும் இறுகுகிறது.
இந்தக் கதைகளில் இத்தகையச் சமூகத்தில் வாழும் பெண்கள் இருக்கிறார்கள். தங்கள் சிந்தனை, செயல், பேச்சு, நடவடிக்கைகளின் வழி சில அதிர்வலைகளை எழுப்புகிறார்கள். மனித மனசாட்சியை அசைத்துப் பார்க்கிறார்கள்.